श्रमिकको पसिनामा रजाइँ गरिरहेका उपसचिव आचार्य औरही नगरपालिका पुगे

काठमाडौं। श्रमिकले पसिना बगाएर जम्मा गरेको वैदेशिक रोजगार कल्याणकारी कोषको पैसामा रजाइँ गरिरहेका उपसचिव सुशिलप्रसाद आचार्यको महोत्तरीको औरही नगरपालिकामा सरूवा भएको छ। संघीय मामिला तथा सामान्य प्रशासन मन्त्रालय वैदेशिक रोजगार बोर्डको सचिवालयमा कार्यरत उपसचिव आचार्यलाई औरही नगरपालिकाको प्रमुख प्रशासकीय अधिकृतमा सरूवा गरेको हो। स्थानिय तहका निमित्तलाई सिनित्त पार्ने संघीय मामिला तथा सामान्य प्रशासन मन्त्री भगवती न्यौपानेको अभियान अन्तर्गत आचार्यलाई औरहीको प्रमुख प्रशासकीय अधिकृत बनाएर पठाइएको छ।

वैदेशिक रोजगार बोर्डको सचिवालयमा बसेर कल्याणकारी कोष हेर्दै आएका आचार्यले महालेखापरीक्षकको कार्यालय बेरूजु औंल्याएको विद्युतीय गाडी दुरुपयोग गर्दै आएका थिए। उनले चढ्ने गाडी श्रमिकको पसिनाबाट जम्मा भएको कल्याणकारी कोषको बजेटबाट किनिएको हो। महालेखापरीक्षकको कार्यालयले उक्त कोषको रकमबाट गाडी किन्न मिल्दैन भनेको छ। कल्याणकारी कोषको उद्देश्यविपरीत रकम अपचलन गरेर किनेको गाडीमा उपसचिव आचार्यले रजाइँ गर्दै आएका थिए। अब भने उनले त्यो गाडी छाड्नु पर्ने भएको छ।

आचार्यले रोजगार मेलामा नाममा दुबई घुम्न जाँदा कल्याणकारी कोषबाट २ लाख ४१ हजार ७३ रुपैयाँ भ्रमण खर्च लिएको पनि महालेखापरीक्षकको कार्यालयको प्रतिवेदन औंल्याएको छ। वैदेशिक रोजगार बोर्डमा बसेर कल्याणकारी कोषको पैसामा तरमारिरहेका आचार्यलाई सामान्य प्रशासन मन्त्रालयले औरही नगरपालिकाको प्रमुख प्रशासकीय अधिकृत बनाएर पठाएको हो। उनले त्यहाँ बस्दा नियम कानुन हेर्छन् कि कल्याणकारी कोषको रकम जस्तै जथाभावी खर्च गर्छन् त्यो पत्ता लगाउन भने अर्को वर्षको महालेखापरीक्षकको कार्यालय प्रतिवेदन नै हेर्नुपर्ने हुन्छ।