सुवर्णप्राशन विन्दु अभियानको विवाद: आज दिउँसो १२ बजेपछि प्रतिरक्षात्मक छलफल हुँदै

काठमाडौं । स्वास्थ्य तथा जनसङ्ख्या मन्त्रालयले “सुवर्णप्राशन विन्दु” अभियानलाई लिएर उत्पन्न विवादको प्रतिरक्षा गर्न आज दिउँसो १२ बजेपछि छलफल आयोजना गरेको छ। यो अभियान सुरु भएकै दिन स्वास्थ्य लाइभ मिडियाले दर्ता बिना नै अवैध तरिकाले सञ्चालन भएको भन्दै बालबालिकाको स्वास्थ्यसँग गम्भीर खेलवाड भएको समाचार प्रकाशित गरेको थियो। त्यसयता बालरोग विशेषज्ञहरू, चिकित्सक तथा नागरिक समाजहरूले यो अभियानको चर्को विरोध गर्दै आएका छन्, जसले बालबालिकाको स्वास्थ्यप्रति गम्भीर चासो र चिन्ता व्यक्त गरेका छन्।

मन्त्रालय स्रोतका अनुसार, यो छलफलमा स्वास्थ्य मन्त्री प्रदीप पौडेलको नेतृत्वमा स्वास्थ्य सचिव, नीति योजना महाशाखा प्रमुख कृष्णप्रसाद पौडेल, स्वास्थ्य सेवा विभागका महानिर्देशक डा. टंकप्रसाद बराकोटी लगायत सहभागी हुनेछन्। यी पदाधिकारीहरू बालरोग विशेषज्ञका रूपमा परिचित छन् र बालबालिकाको स्वास्थ्यसँग सम्बन्धित सल्लाह दिन सक्षम छन्। तर, अभियान सुरु हुँदाको समयमा यिनै विशेषज्ञहरूबाट सल्लाह नमागिएको रहस्य अझै खुल्न सकेको छैन, जसले विवादलाई थप जटिल बनाएको छ।

छलफलमा औषधिको दर्ता नभए पनि मन्त्री जाेगाउन दर्ता रहेको देखाउने, राम्रोसँग काम गरेकाे  बनाउन वैज्ञानिक आधार प्रस्तुत गर्ने, बालबालिकालाई कुनै हानि नहुने प्रमाण पेस गर्ने तथा अभियानको निरन्तरताको पक्षमा जोड दिइने बताइएको छ।

मन्त्रालयले यो आयुर्वेदिक औषधि बालबालिकाको रोग प्रतिरोधी क्षमता वृद्धिका लागि सुरक्षित र भारतमा वैधानिक रूपमा प्रयोग भइरहेको तर्क गरेको छ। तर, औषधि व्यवस्था विभागमा दर्ता नभएको र मुख्य घटक स्वर्ण भष्मको आयात अवैध भएको भन्दै अभियान रोक्न माग गरेका छन्।