स्वास्थ्य मन्त्रालयमा गइनन् सहसचिव निता, दिवसलाई पठाइयो

काठमाडौं। स्वास्थ्य तथा जनसंख्या मन्त्रालयमा कागजी सरूवा भएकी निता अर्याल पोखरेल हाजिर नै नभई संघीय मामिला तथा सामान्य प्रशासन मन्त्रालयमा सरूवा गरिएको छ। उनको ठाउँमा दिवस आचार्यलाई पठाइएको हो।

संघीय मामिला तथा सामान्य प्रशासन मन्त्रालयको आन्तरिक व्यवस्थापन महाशाखा प्रमुख आचार्यको स्वास्थ्य मन्त्रालय सरूवा गरिएको हो। उनलाई स्वास्थ्य तथा जनसंख्या मन्त्रालयको कर्मचारी प्रशासन महाशाखा प्रमुख बनाउने तयारी भइरहेको छ। निर्वाचन आयोगको प्रवक्ताबाट स्वास्थ्य मन्त्रालय सरूवा भएकी निता हाजिर नै नभइ नियमविपरीत सामान्य प्रशासन मन्त्रालयमा सरूवा गरिएको हो।

निजामती सेवा नियमावली, २०५० को नियम ३९ कुनै पनि निजामती भएको कार्यालयमा रमानापत्रमा तोकिएको समयभित्र हाजिर हुनु जानु पर्नेछ। कुनै पनि निजामती कर्मचारीको सरूवा भएको कार्यालयमा हाजिर नभई अर्को पद वा कार्यालयमा सरूवा गरिने छैन। यसरी निर्धारित समयभित्र हाजिर हुन नजाने निजामती कर्मचारीलाई विभागीय कारबाही हुनेछ भन्ने उल्लेख छ। तर, उक्त नियमावलीविपरीत नितालाई सामान्यले नै विभागीय कारबाही गर्न छाडेर उल्टै पुरस्कृत गरेको हो। यसले भगवती न्यौपानेको सुशासनले पनि हावा खाएको छ।

बागमती प्रदेशमा सरूवा भएकी पार्वती शर्मा पनि संघीय मामिला तथा सामान्य प्रशासन मन्त्रालय वा अन्तर्गत भएकी छिन्। उनको पनि ताल उस्तै देखिन्छ।

सञ्चार तथा सूचना प्रविधि मन्त्रालय वा अन्तर्गत सरूवा भएका कृष्णप्रसाद मैनाली प्रधानमन्त्री तथा मन्त्रिपरिषद्को कार्यालय वा अन्तर्गत सरूवा भएका छन्। उनी सम्पत्ति शुद्धीकरण अनुसन्धान विभागको महानिर्देशक बन्ने उच्च सम्भावना छ। प्रधानमन्त्री तथा मन्त्रिपरिषद्को कार्यालय वा अन्तर्गत सरूवा भएका उदयबहादुर राना मगर सञ्चार तथा सूचना प्रविधि मन्त्रालय वा अन्तर्गत सरूवा भएका छन्।

गृह मन्त्रालयको जगेडामा रहेका वेदप्रसाद खरेल उद्योग, वाणिज्य तथा आपूर्ति मन्त्रालय वा अन्तर्गत सरूवा भएका छन्। कोशी प्रदेशका सामाजिक विकास मन्त्रालयका सचिव हेमराज तामाङलाई संघीय मामिला तथा सामान्य प्रशासन मन्त्रालयको अतिरिक्त समूहमा तानेर लगानी बोर्डमा कामकाजका लागि खटाइएको छ।मधेश प्रदेशको लोक सेवा आयोगमा रहेका विमलप्रसाद बराल सुदूरपश्चिम प्रदेशमा सरुवा भएका हुन्।