५ वर्षदेखि श्रम मन्त्रालयमा जरा गाडेर बसेका अधिकृत शाही मुगुको गाउँपालिकामा खटाइए

काठमाडौं। ५ वर्षदेखि श्रम, रोजगार तथा सामाजिक सुरक्षा मन्त्रालयमा जरा गाडेर बसेका शाखा अधिकृत भिमबहादुर शाही मुगु खटाइएका छन्। २०७१ सालमा पिछडिएको क्षेत्रबाट शाखा अधिकृत बनेर दुर्गम नटेकाका शाही बल्ल मुगुको कार्मारोग गाउँपालिकाको प्रमुख प्रशासकीय अधिकृतमा खटाइएका हुन्।

शाखा अधिकृत भएपछि काठमाडौंको गोकर्णेश्वर नगरपालिकामा डेरा जमाएर बसेका शाही सूर्यप्रसाद गौतम संघीय मामिला तथा सामान्य प्रशासन सचिव हुँदा श्रम मन्त्रालयमा सरूवा भएका थिए। श्रममा गौतमसहित आधा दर्जन बढी सचिव परिवर्तन हुँदा पनि शाही भने उक्त मन्त्रालयमा एकछत्र राज गरेर बसेका थिए। उनलाई बल्ल संघीय मामिला तथा सामान्य प्रशासन मन्त्रालयले क्लष्टर अनुसारको ठाउँमा खटाएर उक्त क्षेत्रलाई न्याय गरेको छ।

गोकर्णेश्वरमा हुँदा आर्थिक विवादमा मुछिएपछि शाहीलाई त्यहाँबाट झिकिएको तत्कालीन संघीय मामिला तथा सामान्य प्रशासन मन्त्रालयका अधिकारीहरू बताउँछन्। धेरै गुनासो आएपछि सचिव गौतम कै निर्देशनमा उनलाई त्यहाँबाट हटाइएको बताइन्छ। गोकर्णेश्वरमा डेरा जमाएर बसेका शाखा अधिकृत शाही श्रममा आएपछि जरा गाडेर बसेका थिए। उनले मन्त्रालयको स्टोर हेर्ने गरेको र मन्त्रालयको स्रोत साधन व्यापक दुरूपयोग गर्ने गरेको आरोप लाग्दै आएको थियो। कार्यालय सहयोगीलाई समेत स्कुटर सिक उपलब्ध गराउँछु भन्ने गरेको कुरा समेत मन्त्रालयमा चर्चा छ। उनै शाहीलाई सरकारले मुगु खटाएर सेवा गर्ने अवसर दिएको हो।