ऊर्जा सचिव आचार्य सेवानिवृत्त, चटौत सचिवका प्रबल दाबेदार

काठमाडौं। ऊर्जा जलस्रोत तथा सिंचाई मन्त्रालयका ऊर्जा हेर्ने सचिव सुरेश आचार्यले अनिवार्य अवकाश पाएका छन्। ५८ वर्षे उमेर हदका कारण आचार्यले १५ गते आजबाट अनिवार्य अवकाश पाएका हुन्। १४ गते नै बिदाई हुनुपर्नेमा शनिबार परेकाले उनको बिदाई भएको छैन।

इन्जिनियरिङ क्लष्टरबाट २०७७ मंसिर १० गते सचिवमा बढुवा भएका आचार्य ५ वर्षे कार्यकाल पूरा नगरी ३ महिना अगावै घर गएका हुन्। उनले अवकाश पाएसँगै ऊर्जामा सचिव रिक्त भएको छ।

आचार्यले सहरी विकास मन्त्रालय, राष्ट्रिय सतर्कता केन्द्र, खानेपानी मन्त्रालय, जल तथा ऊर्जा आयोगको सचिवालय जस्ता निकायमा बसेर सचिवको भूमिकामा काम गरे। उनी आकर्षक मन्त्रालय चलाउने सचिवमा ‘दर्ज’ भएका छन्।

आचार्य अवकाशमा गएसँगै इन्जिनियरिङ समूहबाट ऊर्जातिर कै चिरञ्जीवी चटौत सचिव बढुवाका प्रबल दाबेदार हुन्। उनी हाल ऊर्जा मन्त्रालयमै कार्यरत छन्। चटौतसँगै जगदिश्वर कर्माचार्य र नविनराज सिंह सचिव बढुवाको प्रतिस्पर्धामा छन्। एक नम्बरमा सिफारिस हुने चटौतको आगामी असार १५ गते ५८ वर्ष पुग्ने भएकाले उनी नै सचिवमा बढुवा हुने निश्चित छ।