भावी प्रधानमन्त्रीको झापाका स्थानीयसँग भेटघाट सुरु

झापा — प्रतिनिधि सभाको प्रत्यक्ष निर्वाचनअन्तर्गत झापा क्षेत्र नम्बर ५ बाट राष्ट्रिय स्वतन्त्र पार्टी (रास्वपा) का उम्मेदवार बालेन्द्र शाह (बालेन) ले चुनावी भेटघाटलाई तीव्र पारेका छन्। बुधबार बिहानैदेखि उनी झापाका विभिन्न स्थानमा पुगेर मतदातासँग प्रत्यक्ष संवादमा व्यस्त छन्।

वैकल्पिक राजनीति र सुशासनको सन्देश लिएर झापा पुगेका शाहले स्थानीय तहमा जनताका आवाज सुन्ने र आफ्ना योजना राख्ने कार्यक्रमलाई प्राथमिकता दिएका छन्। यसै क्रममा उनले दमक नगरपालिका वडा नम्बर ५ स्थित चुनावी सम्पर्क कार्यालयमा स्थानीय बासिन्दासँग प्रत्यक्ष छलफल गरेका छन्।

भेटघाटका क्रममा स्थानीय मतदाताले रोजगारी, विकास, सेवा प्रवाह र समसामयिक राजनीतिक विषयमा आफ्ना समस्या तथा अपेक्षा राखेका थिए। जवाफमा शाहले काठमाडौं महानगरपालिकामा आफूले गरेको काम, शहरी व्यवस्थापन, रोजगारी सिर्जना र पारदर्शी शासनका अनुभव साझा गर्दै आगामी दिनमा संघीय तहमा गर्न चाहेका योजनाबारे धारणा राखेका थिए।

झापा क्षेत्र नम्बर ५ लाई देशकै ‘हाइ–प्रोफाइल’ निर्वाचन क्षेत्रका रूपमा लिइन्छ। यस क्षेत्रमा बालेन शाहको सक्रिय उपस्थितिलाई राजनीतिक वृत्त मात्र होइन, राष्ट्रिय र अन्तर्राष्ट्रिय स्तरमै चासोका साथ हेरिएको छ। काठमाडौं महानगरमा गरेका कामका कारण चर्चामा रहेका शाहको झापा यात्रा र मतदाता भेटघाटलाई आगामी राजनीतिक दिशासँग जोडेर विश्लेषण हुन थालेको छ।

काठमाडौंमा देखाएको कार्यसम्पादन र वैकल्पिक राजनीतिक धारका कारण समर्थकहरूले उनलाई भविष्यको राष्ट्रिय नेतृत्वका रूपमा हेर्न थालेका छन्। यही पृष्ठभूमिमा झापाबाट सुरु भएको बालेन शाहको चुनावी भेटघाटले चुनावी माहोललाई थप रोचक बनाएको छ।