राजकुमार र रञ्जितालाई भ्रष्टाचार मुद्दा, बलरामलाई अर्को चरणमा

काठमाडौं। अख्तियार दुरूपयोग अनुसन्धान आयोगले पूर्वमन्त्रीद्वय राजकुमार गुप्ता र रञ्जिता श्रेष्ठलाई भ्रष्टाचार मुद्दा दायर गरेको छ। पोखराको लिचिबारीको जग्गा हडप्न बिचौलियासँग घूस डिल र लेनदेन गरेको अभियोगमा अख्तियारले तत्कालीन संघीय, मामिला तथा सामान्य प्रशासनमन्त्री राजकुमार गुप्ता, पूर्व भूमि व्यवस्था, सहकारी तथा गरिबी निवारणमन्त्री रञ्जिता श्रेष्ठ, बिचौलिया सुजन लामासहित ७ जनालाई भ्रष्टाचार मुद्दा दायर गरेको हो।

गुप्ता र श्रेष्ठविरुद्ध अख्तियारले ७८ लाख बिगो मागदाबी गरेर मुद्दा दायर गरेको हो। बिचौलिया सुजन लामा,  रामचन्द्र अधिकारी, याम कुमारी गुरुङ, तुल्सीराम बुढामगर र खमबहादुर पुन पनि उक्त मुद्दामा प्रतिवादी कायम भएका छन् ।

उक्त प्रकरणम तत्कालीन भूमि व्यवस्था, सहकारी तथा गरिबी निवारणमन्त्री बलराम अधिकारी र सचिव अर्जुनप्रसाद पोखरेलको नाम समेत उक्त अडिओमा मुछिएका थिए। उनीविरुद्ध भने दोस्रो चरणमा मुद्दा दायर गर्ने अख्तियारको तयारी छ।

पोखराको लिचिबारीको जग्गा हडप्न बिचौलिया सुजन लामासँग घूस डिल गर्दै गरेको तत्कालीन सामान्य प्रशासनमन्त्री गुप्ता र पूर्व मन्त्री श्रेष्ठको आवाज सुनिन्छ। उक्त जग्गा हडप्नका लागि रामचन्द्र अधिकारीलाई कास्कीको प्रमुख मालपोत प्रमुखमा थमौती गर्नका लागि ५३ लाख रुपैयाँ घूस डिल भएको हो। उक्त अडिओमा भएको आवाज गुप्ता र श्रेष्ठ कै भएको अख्तियार स्रोतको दाबी छ। जिल्ला भूमि आयोगको सदस्य बनाउन पनि थप २५ लाख रुपैयाँ घूस लिएको तत्कालीन मन्त्री गुप्तामाथि आरोप छ।

उक्त जग्गा प्रकरणमा पूर्वसचिव पोखरेलमाथि पनि ५ लाख रुपैयाँ पैसा, ‘ग्लेनफिडिक’ रक्सी, वनकुखुरा र अरिंगाल खाएको आरोप छ। बिचौलियाले अख्तियारमा पोखरेललाई रानीबारीस्थित उनकै घरमै पुगेर पाँच लाख रुपैयाँ बुझाएको बयान दिएका छन्।

पछिल्लो समय अख्तियारले आधा दर्जन मुद्दा दायर गर्ने तयारी गरिरहेको स्रोतले बतायो। घटस्थापनादेखि नै अदालत विदा भएकाले अख्तियार रोकिएको बताइन्छ। ठूल्ठूला भ्रष्टाचारका मुद्दामा दसैँ अघि नै अख्तियारले विस्तृत अनुसन्धान गरिरहेको थियो। ति मध्ये अहिले केही भ्रष्टाचारका मुद्दा विशेष अदालतमा लाने अख्तियारको तयारी रहेको बुझिन्छ।