यी महानगर र उपमहानगरपालिकाका निमित्त प्रमुख प्रशासकीय अधिकृत कहिले हट्लान?

काठमाडौं। संघीय मामिला तथा सामान्य प्रशासन मन्त्री भगवती न्यौपानेले नगर र गाउँपालिकामा निमित्त अन्त्य गरेको घोषणा गरेकी छिन्। स्थानीय तह निमित्त कार्यलय प्रमुखका भरमा चलाउने प्रवृत्ति अन्त्य गरेको घोषणा गर्दै मन्त्री न्यौपानेले देशभरीका गाउँपालिका र नगरपालिकामा पूर्ण जिम्मेवारीको प्रमुख प्रशासकीय अधिकृत पठाएको दावी गरेकी हुन्। अब अर्काे चरणमा उपमहानगर तथा महानगरपालिकाहरुलाई निमित्तविहीन बनाइने मन्त्री न्यौपानेको उद्घोष छ।

सहसचिवको दरबन्दी रहेका ९ उपमहानगरपालिका र १ महानगरपालिकामा अहिले पनि निमित्तले प्रमुख प्रशासकीय अधिकृत चलाइरहेका छन्। वीरगञ्ज महानगरपालिकादेखि धरान उपमहानगरपालिकासम्ममा निमित्त प्रमुख प्रशासकीय अधिकृतको राइँदाइँ छ। उक्त ठाउँमा रहेका निमित्तहरूलाई सिनित्त बनाउने मन्त्री न्यौपानेले घोषणा गरेकी छिन्।

सहसचिवको दरबन्दी रहेको वीरगञ्ज महानगरपालिकामा उपसचिव अरविन्द लाल कर्ण निमित्त प्रमुख प्रशासकीय अधिकृत बनेर रजगज गरिरहेका छन्। सहसचिव कै दरबन्दी रहेको धरान उपमहानगरपालिका अम्बिकाप्रसाद चौलागाईं निमित्त प्रमुख प्रशासकीय अधिकृतको जिम्मेवारीमा छन्।

शेरा दरबारको जग्गा फिर्ता ल्याउनु पर्छ भनेर नुवाकोटको प्रमुख मालपोत अधिकृतको जिम्मेवारीबाट भागेर हिँडेका उपसचिव मिनबहादुर भट्टराई इटहरीको उपमहानगरपालिकाको निमित्त प्रमुख प्रशासकीय अधिकृत बनेका छन्। हाल काठमाडौंका सिडिओ छविलाल रिजाल सहसचिव हुँदा प्रमुख प्रशासकीय अधिकृत भएर चलाएका इटहरी उपमहानगरपालिकामा उपसचिव भट्टराईले निमित्त पड्काएका हुन्। जनकपुरधाम उपमहानगरपालिकाको प्रमुख प्रशासकीय अधिकृत पनि निमित्तको भरमा चलेको छ। उक्त उपमहानगरपालिकाको निमित्त प्रमुख प्रशासकीय अधिकृत मित्रलाल ढकाल हुन्।

बाराको कलैया उपमहानगरपालिकाको निमित्त प्रमुख प्रशासकीय अधिकृत उपसचिव नाथु साह रहेका छन्। बुटवल उपमहानगरपालिकाको निमित्त प्रमुख प्रशासकीय अधिकृत उपसचिव मित्रमणि खकाल हुन्। बुटवलमा पहिला सहसचिव नै प्रमुख प्रशासकीय अधिकृत जाने गरेकोमा अहिले उपसचिव खनालले निमित्त बनेर रजगज गरिरहेका छन्।

सहसचिवको दरबन्दी रहेको दाङको तुलसीपुर उपमहानगरपालिका केशवराज पार्धे र घोराही उपमहानगरपालिकामा ऋषिराम केसी निमित्त प्रमुख प्रशासकीय अधिकृत रहेका छन्। पार्धे उपसचिवमा बढुवा हुनेबित्तिकै तुलसीपुर उपमहानगरपालिकाको निमित्त प्रमुख प्रशासकीय अधिकृत बन्न सफल भए। उनी संघीय मामिला तथा सामान्य प्रशासन मन्त्रालयबाटै विकृत अभ्यास गर्न तुलसीपुरमा निमित्त भएर गएका हुन्।

सहसचिवको दरबन्दी रहेको नेपालगञ्ज उपमहानगरपालिकामा उपसचिव रामहरि शर्मा निमित्त प्रमुख प्रशासकीय अधिकृत रहेका छन्। धनगढी उपमहानगरपालिकामा पनि लामो समयदेखि उपसचिव नरेन्द्रबहादुर खाती निमित्त प्रमुख प्रशासकीय अधिकृतको भूमिकामा रहेको पाइन्छ। उनीहरूको निमित्त खोसिने मन्त्री न्यौपानेको उद्घोष छ। मन्त्री न्यौपानेले ती उपसचिवहरूलाई कहिलेसम्म निमित्त प्रमुख प्रशासकीय अधिकृतको जिम्मेवारीबाट हटाएर सहसचिव खटाउछिन् हेर्न बाँकी छ।