८०० अक्सिजन कनसन्टेटर, ९५ भेन्टिलेटर, १२६ वाइप्याप, ७ सिप्याप मेसिन र ३७९५ अक्सिजन सिलिण्डर सहयोग प्राप्त

काठमाडौं ।  सरकारले कोरोना महामारीको दोस्रो छाल दाताकै भरमा पार लगाएको छ । कोभिड बिरामीका लागि चाहिने अत्यावश्यक उपकरण भेन्टिलेटर त्यसका लागि चाहिने वाइप्याप, सिप्याप मेसिन, अक्सिजन कन्सनटेटर र अक्सिजन सिलिण्डर दानदाताबाटै जुटाएर टार्ने देखिएको छ ।

स्वास्थ्य मन्त्रालय व्यवस्थापन महाशाखाका अनुसार दोस्रो छालमा बिभिन्न दाताबाट ८ सय पिस अक्सिजन कन्सन्टेटर, ९५ वटा भेन्टिलेटर, १२६ पिस वाइप्याप मेसिन र ७ पिस सिप्याप मेसिन सहयोग प्राप्त भएको छ । त्यस्तै ३ हजार सात सय ९५ पिस अक्सिजन सिलिण्डर उपलब्ध भएको छ ।

अघिल्लो वर्ष स्वास्थ्य उपकरण खरिदमा विवाद भएपछि स्वास्थ्यका अधिकारीहरुले यसपटक खरिद गर्न चासो देखाएका छैनन् । अघिल्लो वर्ष सरकारले २ सय ८ भेन्टिलेटर सहयोगमार्फत जुटाएको थियो । आफुले खरिद गर्न लागेको १० करोड मुल्यका २२ भेन्टिलेटर, ५० वटा मनिटर र २० वटा वाइप्याप मेसिन स्पेकमा विवाद भएपछि किन्न सकेन ।

कोरोना महामारी नियन्त्रण बाहिर गएपछि सरकारले अन्तराष्ट्रिय सहुदायसँग औपचारीक रुपमा सहयोग मागेको थियो । सरकारले अक्सिजन सिलिण्डर, भेन्टिलेटर र अक्सिजन कनसन्टेटरको आवश्यकता महशुस गरेको थियो । तर, आफुले किन्न भने चाहेन ।

स्वास्थ्य मन्त्रालयका अनुसार पहिलो छालमा टु दी फाउन्डेसनले ३०, निक साइमन फाउन्डेसनले २४, चौधरी फाउन्डेसनले ८, सानोपाइला संस्थाले ६, वान हार्टले २ , भारतले नेपाली सेनालाई १०, भारत सरकारले स्वास्थ्य मन्त्रालयलाई २८, अमेरिकाले १ सय गरी जम्मा २०८ वटा भेन्टिलेटर उपलब्ध भएको थियो । ती उपकरणहरु मन्त्रालयले बिभिन्न जिल्ला र केन्द्रका ठुला अस्पतालमा बितरण गरेको थियो ।

भेन्टिलेटर कसले कति दिए

कहाँ कति वितरण भयो